Anisan’ny zavatra nibahana teo amin’ny fampahalalam-baovao teto Andrenivohitra tato anatin’ny herinandro izao ny momba ny fifamoivoizana sy ny lalana. Iray amin’izay tena nahasarika ny sain’ny maro, ohatra, ny momba ny mpitondra fiara kodiaran-droa, izany hoe môto, izay tsy maintsy manana fahazoan-dalana mitondra (permis de conduire) manomboka izao. Mbola miteraka resaka sy adihevitra ny momba azy io. Ny faharoa dia ny amin’ireo mpanao fitateram-bahoaka miasa amin’ny zotra Antananarivo-renivohitra sy Itaosy iny. Nampiantsoin’ny avy ao amin’ny fiadidiana ny tanànan’Antananarivo ireo tompon’andraikitra eo anivon’ny kaoperativam-pitaterana miasa amin’io zotra io. Voaresakka tamin’izany ny momba ny tsy fanarahan-dalana, toy ny fiodinana an-dalana tsy tonga eny amin’ny faran’ny zotra. Nilaza ny hanara-maso ny eo anivon’ny kaominina ary nandrangaranga fanasaziana raha mbola mitohy ny tsy fanarahan-dalàna sy ny tsy fanajana bokin’andraikitra. Manarakaraka izany, vaovao iray izay mampalahelo ny mahakasika ireo zazavavy anankiroa nodonin’ny lamasinina teto Andrenivohitra. Namoy ny ainy mihitsy ny iray tamin’izy ireo. Voalaza fa tsy naheno ny fandalovan’ny lamasinina izy roavavy satria mitampina “casque” ny sofiny fa variana mihaino zavamaneno. Ankoatr’izany, tsy ihany koa ny fitohanan’ny lalana sy ny fifamoivoizana, izay fahita toy ny andavanandro ary tsikaritra ho mihamafy. Tranga samihafa ireo kanefa miodinkodina amin’ny resaka lalana sy fifamoivoizana daholo. Misy ny mila famahana olana toy ny fitateram-bahoaka izany, ary koa ny fitohanan’ny fifamoivoizana. Heverin’ny manampahefana fa hitondra fanatsarana koa anefa ilay fepetra vaovao hampiharina ho an’ny mpitondra môto. Farany, misy resaka fanabeazana tokony hatao kosa ny mahakasika ilay lozam-pifamoivoizana niteraka fahafatesan’ny zazavavy iray tamin’ireo anankiroa voadonan’ny lamasinina.

Mandrato