Mozika sy vakoka malagasy :
Ny gadona tandonaka avy any amin'ny faritr'i Vakinankaratra

[Vao maheno ny hoe "Tandonaka" dia tonga ao an-tsaina avy hatrany ilay mpihira malaza Mami Bastah]

Ao anatin'ireo haren-tsaina sy vakoka ara-kolontsaina ananan'i Madagasikara, anisan'ny gadona nentim-paharazana nampiavaka ny Faritra Vakinankaratra ny Tandonaka. Raha saika tsy re intsony teo amin'ny sehatry ny mozika nandritra ny taona maro izy io, dia novelomin'i Mami Bastah indray ka nampahafantariny ny taranaka aty aoriana.

Mpanakanto avy ao Vakinankaratra, ary isan'ireo namorona ny tarika Remy avy ao Antsirabe fahiny izy, fantatra amin'ny fahaizany mampifangaro ny mozika nentim-paharazana sy ny mozika maoderina. Ranaivo Maminirina Ramiandraharisoa no tena anarany, izay tsy mpihira fotsiny ihany anefa, fa mpamoron-kira, mpitendry zavamaneno ary mpikaroka ihany koa momba ny kolontsaina malagasy. Ny asany sy ny talentany no nahatonga azy ho isan'ireo mpanakanto nandray anjara lehibe tamin'ny fiarovana sy ny fampiroboroboana ny vakoka ara-javakanto malagasy.

Famelomana indray

Ny Tandonaka dia karazana hira sy gadona nentim-paharazana teraka tany amin'ny Faritra Vakinankaratra. Taloha, dia nifandray akaiky tamin'ny fiainan'ny mponina ambanivohitra izy io ary nampiasaina nandritra ny lanonana ara-pianakaviana sy ara-tsosialy, toy ny famadihana, famorana ary ireo fety nentim-paharazana samihafa.

Ny mampiavaka ny Tandonaka dia ny firindran'ny feo sy ny gadona ateraky ny tehaka sy ny kapoka tanana. Matetika izy io no hiraina tsy asina zavamaneno, ka ny feon'olona sy ny firaisankinan'ireo mpihira no mamorona ny hakanton'ny hira. Tao anatin'izany no nanehoan'ny Malagasy ny hafaliany, ny firaisankiny ary ireo soatoavina nentim-paharazana nampitaina tamin'ny taranaka nifandimby.

Tany amin'ny taona 2004, taorian'ny fikarohana nataony momba ireo gadona nentim-paharazana malagasy, dia tsapan'i Mami Bastah fa mihavery tsikelikely ny Tandonaka. Maro tamin'ireo tanora no tsy nahalala intsony ny fisiany, ary vitsy sisa ireo zokiolona nitahiry ny fomba fihira sy ny gadona nentim-paharazana.

Fanavaozana

Niteraka fahavononana sy risim-po taminy izany ka nanosika azy hamelona indray ity vakoka sarobidy ity. Tsy nijanona tamin'ny famerenana ny endriny taloha anefa izy, fa nampiditra fanavaozana mifanaraka amin'ny vanim-potoana. Nampiasainy ny gitara, harmonica ary zavamaneno hafa mba hahatonga ny Tandonaka ho akaiky kokoa ny sofina sy ny tsiron'ny tanora ankehitriny.

Nahomby izany ezaka izany satria nanomboka nankafizin'ny olona indray ilay gadona, ary nitombo ireo liana hahafantatra bebe kokoa ny niandohany sy ny lanjany ara-kolontsaina.

Maro ireo hira sy rakikira namantarana an'i Mami Bastah. Anisan'izany ny "Tandonaka", "Arahaba", "Lakana Kely", "Fihavanana", "Aza Omena Tsiny", "Voasary Mandarina" ary "Mila Vonjy Ny Gasilahy".

Hira malaza

Tsetratsetra tsy aritra ihany koa no ilazana fa ilay hira malaza "Ravorondreo", an'ny tarika Mahaleo, dia fantatra fa avy amin'ny gadona Tandonaka. Tsy mozika fialamboly fotsiny ireo hira ireo, fa mitondra hafatra lalina momba ny fihavanana, ny firaisankina, ny fiainam-piarahamonina ary ny fitiavana ny kolontsaina malagasy. Amin'ny alalan'ny tononkira sy ny gadona dia manentana ny olona hiaro sy hankafy ny maha-izy azy, izy ireo.